Kelvin Nashon aukubali mziki wa Aziz KI

Kiungo mkabaji wa Ihefu FC, Kelvin Nashon amesema uzoefu na ubora wa Stephane Aziz Ki ndio umeamua mchezo wa jana huku akikiri kutumia muda mrefu kumsoma na kufanya jitihada za kumkaba, lakini alikwama.

Kwenye mchezo huo ilionekana bato ya viungo hao wawili kuanzia dakika ya kwanza ya mchezo hadi 120, huku Aziz Ki akifanikiwa kuiandikia Yanga bao la ushindi lililoipeleka fainali.

Akizungumza na Mwanaspoti, Nashon ambaye anatajwa kama mmoja kati ya viungo mahiri hapa nchini amesema ilimchukua muda kumsoma Aziz Ki kabla ya mchezo huo kutokana na kutambua kuwa ndio mchezaji hatari ndani ya kikosi cha Yanga.

“Haukuwa mpango wa kocha Mecky Maxime, hiyo ni kazi yangu nilijipa mwenyewe kuhakikisha napunguza makosa ya timu kwa kumzuia zaidi Aziz Ki na sikufanya hivyo kwake tu kwani Yanga ina wachezaji wengi wazuri,” alisema.

“Nilifanya hivyo pia kwa Maxi Nzengeli, Pacome Zouzoua kwa sababu hao pia ni bora ndani ya Yanga na ili ufanikiwe kucheza na timu hiyo ni kuchagua kukaba zaidi kuliko kucheza nao, lazima watakuzidi.

Fainali ya michuano hiyo kati ya Azam FC na Yanga sasa inatarajiwa kupigwa Juni 2, mwaka huu kwenye Uwanja wa Tanzanite mkoani Manyara.