Kamati Yanga yapewa kazi

KUTOA elimu kwa wachezaji wa klabu ya Yanga ni moja ya majukumu ya kamati ya ufundi ya klabu hiyo iliyochaguliwa hivi karibuni na Mwenyekiti Mshindo Msolla.

Katika kuhakikisha Yanga inakuwa bora na imara iliundwa kamati ya ufundi yenye mafundi wa soka wa zamani, Ally Mayay, Kanali Idd Kipingu, Kennedy Mwaisabula pamoja na Sunday Manara.

Akizungumza na Mwanaspoti, Mayay mchezaji wa zamani wa Yanga alisema wana majukumu mengi ikiwemo kufanya semina kwa wachezaji kuwakumbusha mambo ya ndani na hata nje ya uwanja.

“Na ndio maana katika kamati hiyo wote ni wachezaji wa zamani, tukikutana tunabadilishana mawazo huyu anafahamu hiki huyu kile mwishowe tunapata jibu moja na zuri, kwa kuwa katika mpira kila mmoja ana muono wake,” alisema.

“Pia jukumu letu jingine ni kutengeneza sera ambazo ni miongozo, kuanzia benchi la ufundi, muundo wa benchi na mahitaji yake, sisi tunashauri na kusimamia.”