Juma Abdul amchambua Yao mbele ya Kibwana

Beki wa Zamani wa Yanga SC, Juma Abdul Mnyamani amefunguka kuhusu uwezo wa beki mpya wa Yanga Kouassi Attohoula 'Yao' (26), raia wa Cote d'Ivoire.

Juma Abdul ambaye ameichezea Singida Fountain Gate msimu uliopita kabla ya kuondoka msimu huu amesema amemtazama beki huyo mzuri ametimia ana kila kitu cha full back anachotakiwa kuwa nacho.

"Yao ana kasi, ana nguvu, ana akili, anaweza na anajua wakati gani wa kupanda kushambulia na wakati gani wa kuzuia. Kiufupi jamaa ni beki mzuri sana atawasaidia sana Yanga," amesema Juma.

Pia, staa huyo wa zamani wa Taifa Stars ametoa utofauti wa Kibwana Shomary na Kouassi Yao amesema Yao anaonekana alikuwa anachezaga nafasi ya kiungo zamani .

Hii ni kutokana na staili yake anavyocheza, kuna muda anaweza kuingia ndani kuna muda anaweza kupiga chenga, hivyo wanaweza kucheza mabeki ambao wamezoea kucheza namba tofauti.

"Mfano mimi, Shomary Kapombe tunaweza kucheza kwa staili hiyo kwa sababu tulikuwa viungo, zamani hivyo inampa shida mdogo wangu kwa Kibwana maana yeye amezoeza kucheza ubavu, yani kibendera hadi kibendera," amesema Juma Abdul.

Yao ambaye amesajiliwa msimu huu akitokea Klabu ya ASEC Mimosas ya Cote d'Ivoire, tayari amechezea mechi tano tangu atue Yanga Sc akiwa amefunga bao moja na assist moja.