JKT Tanzania, Kagera hakuna mbabe Ligi Kuu
Maafande wa JKT Tanzania imeambulia pointi moja ikicheza kwa mara ya kwanza nyumbani baada ya jioni hii kulazimishwa sare ya bao 1-1 na Kagera Sugar katika mechi ya Ligi Kuu Bara iliyopigwa Uwanja wa Kambarage, mjini Shinyanga.
JKT iliyopanda Ligi Kuu kutoka Ligi ya Championship, imeuchagua uwanja huo wa Kambarage kama wa nyumbani kutokana na Uwanja wa Meja Jenerali Isamuhyo, uliopo Mbweni jijini Dar es Salaam ukiwa kwenye ukarabati na mechi hiyo ilikuwa ya kwanza kucheza uwanjani hapo.
Timu hizo zilionyesha soka la ushindani tangu dakika ya kwanza kwa kila upande ikisaka mabao ya mapema, lakini milango ilikuwa migumu hadi kipindi cha kwanza kilipokamilika licha ya kuwepo kwa kosakosa nyingi.
Kipindi cha pili timu zote zilifanya mabadiliko ya wachezaji ili kuongeza nguvu, lakini mambo yaliendelea kuwa magumu hadi kwenye dakika za nyongeza wakati mashabiki wakiamini ngoma imeisha kwa suluhu, JKT ikapata penalti iliyofungwa na Danny Lyanga likiwa ni bao la kwanza katika ligi akiwa na timu hiyo iliyomsajili msimu huu kutoka Gaita Gold.
Furaha ya maafande hao wa JKT wala haikudumu, kwani sekunde chache tu baada ya bao hilo la penalti, wageni Kagera ilichomoa bao hilo kupitia kwa Gasper Mwaipasi kabla ya kipyenga cha mwisho kulia na matokeo kuwa sare ya 1-1.
Matokeo hayo yamezifanya timu zote kugawana pointi moja moja zikifikisha pointi nne baada ya kucheza michezo minne kila moja, Kagera ikitoka nafasi ya 10 hadi ya nane wakati, JKT ikichupa kwa nafasi moja kutoka ya 10 hadi ya 11.
Mara baada ya pambano hilo, mchezo mwingine baina ya Coastal Union na Tabora United utafuata muda mchache ujao kwenye Uwanja wa Mkwakwani, jijini Tanga.
Coastal inavaana na Tabora iliyopanda daraja kutoka Ligi ya Championship ikiwa na pointi moja katika michezo mitatu iliyocheza awali, huku wageni hao wa ligi wakiwa na pointi nne kwa idadi ya michezo mitatu, ikishinda mchezo mmoja uliopita kwa kuichapa Tanzania Prisons, kutoka sare na Singida Big Stars na kupasuka mechi ya kwanza kabisa mbele ya Azam FC huku ikiwa na wachezaji wanane tu uwanjani.