Ishu ya Kagoma dhidi ya Simba na Yanga ni pasua kichwa

Simba na Yanga wote walikuwa wanaitaka huduma ya Yusuph Kagoma kutoka Singida, ila walioenda mbele ni Yanga ambao waliwasiliana na Mchezaji pamoja na timu yake, ni Yusuph Kagoma aliyepeleka offer kwa Viongozi wa Singida kuwa anahitaji kujiunga na Yanga makubaliano yakaanza kufanyika.

Mwezi mmoja uliyopita, Yanga waliilipa Singida kiasi kinachokadiriwa kuwa ni milioni 30 za Kitanzania kuinasa saini ya Kagoma, kila kitu kilienda sawa na Kagoma akasaini Yanga ya Jangwani.

Baadae Simba wakaenda mbele ikidaiwa kuwa waliweka ofa kubwa kuliko ile ya Yanga, wakawafuata Singida na kiasi kinachotajwa ni milioni 50 huku mchezaji akiahidiwa Mshahara mnono na ada nzuri kuliko ile ya Yanga.

Singida kwa weledi mkubwa waliwasihi Simba na Kagoma kuwa tayari wao walishavuta pesa ya Yanga na wamesaini kila kitu ikiwemo Mchezaji, hivyo wao hawahusiki tena na biashara hiyo bali mwenye mali ni Yanga, wao ndio wana haki zote za Kagoma.

Kilichopo kwa sasa ni Kagoma kuvutiwa zaidi na ofa ya Simba ambayo ni kubwa ila bahati mbaya kwake ni kuwa alishasaini Yanga, hapo hakuna utata wowote labda Yanga sasa watumie busara ya kukubali ombi la Kijana kurejesha pesa ili akacheze Simba.