Hassan Dilunga "HD"
Kiungo wa zamani wa Simba,Hassan Dilunga amesema msimu ujao wa Ligi Kuu ya Tanzania Bara yupo tayari kucheza timu yoyote lakini kipaumbele chake cha kwanza ni maslahi. Dilunga amekuwa nje kwa muda mrefu kutokana na kuumia wakati akiitumikia Simba.
Mchezaji huyo wa zamani wa Mtibwa Sugar na JKT Tanzania alisema kwa sasa amepona na yupo fiti asilimia 100 na anauhakika msimu ujao kuwasha moto.
"Soka ndio maisha yangu,nipo tayari kucheza popote kikubwa maslahi,atakaekuja vizuri na tukaelewana nae ndiko nitakapocheza,"alisema Dilunga
Kuhusu kurudi Simba alisema; "Naendelea kuwasikilizia nafanya nao tu mazoezi kama ambayo ninavyofanya na Mtibwa na timu zingine."
Mchezaji huyo ameushukuru uongozi wa Simba kwa kumtibu kwa ufasaha kipindi alichokuwa akiumwa.
"Nitakuwa mchoyo wa fadhila nisipowashukuru viongozi wa Simba wamenipambania kuhakikisha napata tiba sahihi, nimepata nawashukuru nimepona kwa asilimia 100," alisema kiungo huyo.
Hata hivyo mchezaji huyo amezishauri klabu za Ligi Kuu kutokuwatelekeza wachezaji pindi wanapoumia.