Infantino, Motsepe jukwaani Simba, Ahly

Simba imethibitisha kwamba Marais wa Shirikisho la Soka Duniani (FIFA), Gianni Infantino na mwenzake wa Shirikisho la Soka Afrika (CAF), Patrice Motsepe watakuja nchini kushuhudia ufunguzi wa mchezo wa African Football League kati ya mwenyeji Simba dhidi ya Al Ahly.

Afisa Mtendaji Mkuu wa Simba Imani Kajula amesema mbali na viongozi hao wakubwa wa mashirikisho hayo pia wanatarajia kupokea wageni mbalimbali na marais wa mashirikisho ya nchi watakaokuja maalum kwa ajili ya mchezo huo utakaopigwa Oktoba 20.

"Tunatarajia kupokea viongozi hao wakubwa, taratibu za mapokezi yao ziko sawasawa tukishirikiana na wenzetu shirikisho la Soka Tanzania (TFF) kuhakikisha kila kitu kinakwenda sawa.

Aidha Kajula ameishukuru serikali ya Jamhuri ya Muungano wa Tanzania kwa juhudi zake kuhakikisha kila kitu kinakwenda sawa katika taratibu ambazo walitakiwa kuzikamilisha.

"Serikali imetusaidia sana kukamilika kwa taratibu za mchezo huu kufanyika, mambo mengi yamekamilika kwa wakati kuanzia marekebisho makubwa ya uwanja wa mchezo lakini nisiwasahau TFF wamefanya kazi yao kama wenyeji."