Ihefu wanaitaka Yanga

Yanga SC dhidi ya Ihefu SC ni mchezo unaomshawishi kila mpenzi na mdau wa soka kuutazama kutokana na uhitaji na umuhimu wa alama tatu kwa kila timu lakini pia ubora wa vikosi vya timu hizi bila kusahau matokeo ya mchezo wa mzunguko wa kwanza.

Wananchi wanahitaji alama tatu ili kufikisha alama 49 na kuendelea kujikita kileleni mwa msimamo wa Ligi na kuongeza tofauti ya alama dhidi ya wapinzani wake [Azam na Simba] kwenye mbio za ubingwa msimu huu.

Kwa Ihefu alama tatu ni muhimu kwa sababu itafikisha alama 26 na kusogea kutoka nafasi ya nane hadi nafasi ya saba. Kwa mujibu ya uongozi wa timu hiyo, malengo yao ni kumaliza Ligi wakiwa nafasi za juu.

Yanga inaingia kwenye mchezo huu huku wachezaji wake wengi waliokosekana kwenye mchezo uliopita wakiwa wamerejea kikosini [Diarra, Lomalisa, Pacome, Musonda, Guede]. Aucho anaendelea kukosekana kutokana na majeraha.

Ihefu imezidi kuimarika baada ya kusajili wachezaji wengi wakati wa dirisha dogo [Khomeny, Abuya, Onyango, Rupia n.k] ambao wote wameingia moja kwa moja kwenye kikosi cha kwanza.

Matokeo ya mchezo uliopita kule kwenye uwanja wa Highland Estates, Mbarali, Mbeya yanasababisha mchezo wa leo kuwa na ushindani mkubwa. Wananchi wamepanga kulipa kisasi lakini Ihefu wanataka kuthibitisha walichokifanya Oktoba 4, 2023 hawakubahatisha.