Hadithi za Mkude, Ajibu ni pasua kichwa

Ni wachezaji wazawa ambao wanaaminika kuwa na vipaji vya hali ya juu lakini mara kadhaa wamekuwa wakiingia katika migogoro aidha na viongozi ama walimu wa vilabu wanavyochezea.

Mashabiki na wapenzi wa Soka nchini wanaamini katika vipaji vya wachezaji hao lakini kukosa kwao nafasi katika michezo mbali mbali ya Ligi ndio kunaacha maswali.

Kuna vingi vinavyoongelewa ambavyo havijapata uthibitisho wa moja kwa moja ikiwemo nidhamu ya nje ya uwanja kwa nyota hao kama vile uchelewaji mazoezini, utoro, ulevi na uvivu.

Lakini wamepita walimu tofauti tofauti na wote wamefanya vitendo vile vile kwa wachezaji hawa ambao wanaaminika kuwa na uwezo mkubwa viwanjani.

Pengine labda tusubiri upande ambao utaamua kuzungumza ukweli ndio utakaotupa mamlaka ya kuzungumza kwa sauti na kiundani zaidi.

Tangu kuanza kwa msimu huu Mkude na Ajib wamecheza mechi moja tu ya Ligi Kuu, dhidi ya Nambungo ambapo Mkude yeye alianza wakati Ibrahim Ajib aliingia akitokea benchi.