Gued atafaulu mtihani wa jezi namba 14?

Siku moja baada ya kuambulishwa kwa mshambuliaji mpya wa Yanga, Joseph Guede, ana mitihani miwili ndani ya timu hiyo akiifanya vizuri, basi thamani na jina lake vitaendelea kusalia mioyoni mwa mashabiki timu hiyo.

Baada ya utambulisho nyota huyo alikabidhiwa jezi namba 14 ambayo ilikuwa inavaliwa na Yusuph Athuman, ambaye hakuwa na nafasi ndani ya kikosi cha Yanga hadi akapelekwa kwa mkopo Coastal Union nako hakufanya vizuri.

Kiwango cha Guede kitaifanya jezi namba 14 iendelee kuwa ya kawaida au thamani yake ipande, kama ilivyokuwa jezi namba sita iliyokuwa inavaliwa na Feisal Salum 'Fei Toto' (Azam). Wakati wa usajili mkubwa mashabiki wa Yanga ilisubiri kwa hamu kuona nani atayevaa jezi namba sita aliyotambulishwa nayo Skudu Makudubela ambaye hadi sasa kacheza mechi nne za ligi alizotumika kwa dakika 166.

Mtihani wa pili ambao utamkabili straika huyo ni je ataziba pengo la Fiston Mayele ambaye ndani ya misimu miwili alifunga mabao 33 kwenye Ligi Kuu, ambapo Yanga ilitegemea ujio wa Hafiz Konkon ungefanya makubwa, lakini mambo yalikwenda ndivyo sivyo.

Hadi sasa Konkoni anamiliki bao moja katika Ligi Kuu licha ya kupewa nafasi kubwa ya kucheza na tayari ameondoka kikosini hapo kwenda Uturuki kwa mkopo. Mtihani huo anapaswa kuufauru Gued.