Kocha wa Man U, Ole Gunner Solkjaer
Wamiliki wa klabu ya Manchester United, Familia ya Glazers wanaripotiwa kuwa hawajajiandaa kumpatia meneja Ole Gunner pesa kwa ajili ya usajili wa dirisha la mwezi Januari.
Licha ya kutumia pesa kubwa kwa ajili ya usajili wa Cristiano Ronaldo, Jadon Sancho na Raphael Varane, matarajio ya klabu yanaonekana kuendelea kubuma chini ya Ole Gunnar.
Matokeo mabaya yanaendelea kumpa shinikizo Ole Gunner, ambaye anaonekana kuwa karibu kukalia kuti kavu baada ya wachezaji kadhaa wakubwa kuripotiwa kuwa wanataka meneja huyu aondoke klabuni hapo.
Kusalia kwa Ole mpaka sasa ni kwa sababu ya uhusiano wake mzuri na wakubwa wa Man United, ambao wana matumaini meneja huyu anaweza akapindua meza na kurejea kwenye njia ya ushindi.
Kwa mujibu wa The Mirror, Familia ya Glazer, haina imani kuwa dirisha la Uhamiso la mwezi Januari linaweza kubadilisha changamoto iliyopo klabuni hapo, na hivyo hawatatoa fedha kwa ajili ya usajili.
Ripoti zinaeleza zaidi kuwa Ole Gunnar hajioni hata kidogo akiwa kwenye hatari ya kupoteza kibarua chake kwa sasa.
United wamepoteza gemu nne kati ya gemu sita zilizopita za EPL chini ya Ole na wanajiandaa kuvaana na Watford baada ya likizo ya kimataifa.