Gamondi ataja kilichowamaliza Simba kwa Mkapa

Kocha wa Mkuu qa Yanga, Miguel Gamondi anasema haikuwa rahisi kupata ushindi mbele ya wapinzani wao Simba Sc kwani mchezo ulikuwa mgumu kwa pande zote lakini uzoefu wa wachezaji wake na kujituma kwao ndiko kumewapa matokeo chanya.

Gamondi amesema hayo baada ya kutamatika kwa mchezo huo wa Ligi Kuu ya NBC uliopigwa katika Dimba la Mkapa huku Yanga wakifanikiwa kuibuka na ushindi wa bao 2-1 na kufikisha alama 58 kwenye msimamo wa Ligi.

"Najivunia wachezaji wangu maana hata nyakati ambazo hawachezi vizuri lakini wanapambana kupata matokeo mazuri. Nadhani michuano ya Ligi ya Mabingwa Afrika imewapa uzoefu wa kutosha na ndicho walichokifanya leo.

"Wachezaji wangu wamejitoa sana na wamecheza kwa umoja. Kumbuka tulikuwa tunacheza na Simba, moja ya timu bora nchini kwa hiyo na wao walikuwa wanatafuta ushindi lakini haikuwa hivyo.

"Ushindi huu ni maalum kwa “Wananchi” (mashabiki wa Yanga) na malegend wa timu ambao wamekuja kutupa hamasa na sapoti. Hii imetupa nguvu ya kupambana zaidi kelekea ubingwa msimu huu," amesema Gamondi.

Magoli ya Stephane Aziz Ki (20) kwa penati 20 na Joseph Guede (38) yameifanya Simba ambayo imepata goli lake kupitia kwa Freddy Kouablan (73) kujiweka mbali katika mbio za ubingwa

Yanga imeifunga Simba mechi zote za Ligi msimu huu na kufikisha pointi 58 katika mechi 22 na inaongoza msimamo wa Ligi Kuu, #AzamFC nafasi ya pili kwa pointi 51 mechi 23, Simba ni ya tatu ikiwa na pointi 46 katika michezo 21.