Kocha Gamondi.
Klabu ya Yanga imefanikiwa kuibuka na ushindi wa bao 1-0 dhidi ya Namungo FC, jana Jumatano, Septemba 20, 2023 katika Dimba la Azam Complex, Chamazi Dar es Salaam.
Bao pekee la Yanga lililofungwa na Mudathir Yahya katika mchezo huo wa Ligi Kuu ya NBC dakika ya 88, baada ya kuingia kipindi cha pili kuchukuwa nafasi ya Pacome Zouzoua na kuongoza katika msimamo wa ligi hiyo wakifikisha pointi tisa.
Akizungumza mara baada ya kumalizika kwa mchezo huo, Kocha Mkuu wa Yanga, Miguel Gamondi amesema kuwa ilikuwa kazi ngumu kucheza na namungo kwa sababu ni kama walikuwa wameususia mpira na kuwaacha Yanga wacheze kisha wao wakabe njia zao.
“Kama hujawahi kucheza soka huwezi kuelewa ni kwa nini ni vigumu kubadilisha nafasi kuwa mabao. Wakati mwingine wachezaji wanakuwa wamechoka, au psychologically hawako vizuri hili ni soka. Kwenye mechi tatu tumeshinda mabao 15.
“Kushinda bao moja siwezi kuwa na presha na mchezo ujao, presha ya nini? Tunazungumza hili ni soka, sio kila mechi tutafunga bao 5, kuna wakati hatutacheza vizuri lakini tutataka matokeo ili tupate alama tatu, lazima tuwe wakweli.
“Unapocheza na timu uwanjani inawachezaji 10 ndani sio rahisi, hauchezi peke yako na wao wanakuja na pango wao, kwa hiyo sio rahisi kushinda mabao mengi kila siku.
“Kuna wakati unatakiwa uwe mvumilivu ili kupata matokeo chanya kwa sababu huwezi kushinda kwa namna tu ambavyo unataka wewe mwalimu. Wakati mwingine unachelewa kupata bao au unashinda mabao machache.
“Kwa Mudathir sikuona kitu kingine zaidi ya kumwambia tazama mpira, nenda kacheze na ufunge bao tushinde basi," amesema Gamondi.