Gadiel amtibulia Mbegu Singida

Kocha Mkuu wa Singida Fountain Gate, Hans Pluijm amesema beki wa kushoto Yahya Mbegu hana tatizo lolote, lakini ishu ipo kwenye namba.

Singida imecheza mechi nne za mashindano tofauti, lakini beki huyo hakuonekana kwenye mchezo wowote ndani ya kikosi

Akizungumza na Mwanaspoti, Pluijm alisema hakuna tatizo lolote baina yake na mchezaji huyo ila ni ugumu wa nafasi yake kutokana na Gadiel Michael kutumika vizuri.

Pluijm alisema muda bado upo wa beki huyo kupata nafasi ya kucheza kwa kuwa kuna mechi nyingi zinakuja.

“Hakuna tatizo na Mbegu, lakini mchezaji wa nafasi hiyo Gadiel anaendelea vizuri, kando na hilo pia Mbegu atapata tu nafasi kwani ndio tumeanza na mechi nyingi bado zinakuja,” alisema.

Aliongeza kuwa kila mchezaji atakayeonyesha kiwango bora atapata nafasi ya kucheza kutokana na michezo kuwa mingi.

Kocha huyo alisema wanaendelea kufanya marekebisho kwa ajili ya mechi ijayo na wachezaji watatumika kutokana na mpango wa mchezo husika akiwemo Mbegu.

Singida ipo jijini Dar es Salaam kwa mchezo wa marudiano wa Kombe la Shirikisho Afrika dhidi ya JKU baada ya mechi ya kwanza iliyopigwa Uwanja wa Azam Complex kushinda kwa mabao 4-1, na leo itakuwa na kazi ya kulinda ushindi ili kusonga raundi ya kwanza ya mashindano.