Fountain Gate Princess yabeba kipa Kenya

Fountain Gate Princess imefanikiwa  kupata saini ya golkipa wa timu ya Taifa ya Kenya ya Wanawake, Monica Odato aliyekuwa akikipiga timu ya Wadadia  FC ya nchini Kenya.

Odato anaziba pengo la  Carolyne Rufa ambaye ametimkia nchini Marekani kwa masomo na ataitumikia timu hiyo msimu huu wa Ligi Kuu ya Wanawake (WPL)

Mpaka sasa timu hiyo imeishakamilisha usajili wachezaji kadhaa akiwemo beki wa kati Suzan Adam na beki wa kulia Sarah Joel  kutoka The Tiger, Rehema Ramadhan, Shehat Juma kutoka Mlandizi Queens na Mshambuliaji wa Osterbay Girl, Zayonce James.

Msimu ulioisha timu hiyo ilishika nafasi ya pili huku Simba Queens wakibeba ubingwa.

Mkurugenzi wa Fountain Gate Academy Japhet Makau amesema Monica  amesaini mkataba wa miaka miwili kuitumikia timu hiyo.

Amesema timu hiyo bado inaendelea kusajili na itakuwa ikitangaza majina kila siku saa 10 jioni ya wachezaji iliyowasajili.

Makau pia  amesema nusu ya wachezaji waliocheza msimu uliopita  wamewaongezea mikataba.

“Hakuna  mchezaji ambaye Kocha amemtaka akamkosa sisi tunasajili kwa matakwa ya Kocha na Mkurugenzi wetu wa ufundi Alex Alumirah,”amesema Makau.