Fernandes apasua vichwa mashabiki

Mashabiki wa Manchester United wameanza kupata wasiwasi wa kuhusu kiungo wao Bruno Fernandes kwamba ataondoka mwishoni mwa msimu huu baada ya kile alichofanya kwenye mechi ya ushindi dhidi ya Newcastle United, usiku wa Jumatano iliyopita.

Ripoti zinadai kwamba Fernandes, 29, anapiga hesabu za kuachana na Man United msimu ujao licha ya mkataba wake kufika ukomo 2026.

Na hilo limetokana na staa huyo wa Ureno kusema mapema mwezi uliopita kwamba anaweza kuachana na miamba hiyo ya Old Trafford ili kwenda kukabiliana na changamoto mpya badaa ya fainali za Euro 2024.

Na sasa mashabiki wa Man United wameanza kuwa na hofu kwamba kiungo wao huyo ataondoka kwa kile alichofanya kwenye mechi ya ushindi wa mabao 3-2 dhidi ya Newcastle uwanjani Old Trafford.

Fernandes alichelewa kwenda kukutana na mashabiki baada ya mechi hiyo kumalizika.

Shabiki wa kwanza aliandika kwenye Twitter: "Anaondoka, sivyo?."

Mwingine aliongeza: "Kuna kila dalili."

Shabiki wa tatu alisma: "Hakika anaondoka."

Shabiki mwingine alisema: "Anaondoka."

Na kuna shabiki mmoja alisema: "Aondoke tu akapumzike."

Hata hivyo, Fernandes hakuonyesha dalili yoyote na alionekana kuwa mwenye furaha alipokutana na mashabiki na kuweka saini kwenye vitabu na jezi zao pamoja na kupiga selfie.

Staa huyo wa zamani wa Sporting Lisbon amekuwa mtu muhimu kwenye kikosi cha kocha Erik ten Hag, licha ya kuwa na mambo mabaya uwanjani, yeye amefunga mabao 15 na kuasisti 12 katika mechi 46.