Familia ya Mudryk kuhamia England kulinda kipaji cha mtoto wao

Nyota wa Chelsea, Mykhailo Mudryk anaamini ataungana na familia yake hivi karibuni kwa sababu anajiona mpweke ndani ya viunga vya Stamford Bridge.

Nyota huyo mwenye umri wa 22 anapitia kipindi kigumu tangu alipotua akitokea Shakhtar Donetsk na anadhani uwepo wa familia yake itamsaidia asijione mpweke.

Taarifa ziliripoti wazazi wa Mudryk watatua jijini London wakaungane na mtoto wao ambaye kiwango chake bado kimeendelea kusuasua.

Uhamisho wa Mudryk ulikuwa na mvutano na ilisemekana angejiunga na Arsenal badala yake akaichagua Chelsea dirisha dogo la usajili la Januari.

Arsenal ilihusishwa na Mudryk kwa muda mrefu lakini uhamisho wake ukabuma huku Chelsea ikaingilia dili hilo na kumnyakua kwa kitita cha Pauni 88 milioni.

Hata hivyo, maisha ya Mudryk ndani ya Jiji la London sio mazuri huku akishindwa kutoa mchango Chelsea licha ya kununuliwa kwa pesa ndefu.

Mudryk tangu alipotua ametoa asisti moja tu katika mechi tisa za Ligi Kuu England alizocheza na akapoteza namba ya kudumu kikosi cha kwanza, Chelsea ikiporomoka hadi nafasi ya 11 kwenye msimamo wa ligi.

Chelsea imeendelea kusuasua kwenye ligi na wikiendi iliyopita ilipokea kichapo cha bao 1-0 dhidi ya Wolves, chini ya kocha wao muda Frank Lampard ambaye alichukua nafasi ya Graham Potter.