Enrique kutibua dili la Neymar Man United
Supastaa, Neymar atasubirisha ndoto zake za kwenda Manchester United pengine kwa mwaka mmoja zaidi endapo kama Paris Saint-Germain watafanikiwa kumtangaza Mhispaniola Luis Enrique kuwa kocha wao mpya.
Staa huyo wa Kibrazili, Neymar alipanga kuhamia Old Trafford kwenye dirisha hili la uhamisho wa majira ya kiangazi, lakini sasa atabaki Paris kama Enrique atatua kupiga kazi Parc des Princes mwezi huu.
Neymar, 31, katika kipindi hiki cha uhamisho wa majira ya kiangazi amekuwa akihusishwa na mpango wa kwenda Man United baada ya kuelezwa anatamani kwenda kukipiga Old Trafford, miamba ambayo inaweza kuwa chini ya umiliki mpya wa tajiri wa Qatar, Sheikh Jassim muda wowote kuanzia sasa.
Kocha wa Man United, Erik ten Hag anatafuta watu wa kwenda kuongeza makali safu yake ya ushambuliaji na PSG iliripotiwa kuweka milango wazi kwa timu itakayomtaka Neymar.
Hata hivyo, kutokana na ripoti za kwanza Enrique anaweza kujiunga na miamba hiyo ya Paris, hilo limemfanya Neymar kufikia kubadili mawazo yake, atahitaji kubaki ili acheze chini ya kocha wake huyo wa zamani waliyekuwa pamoja Barcelona.
Mpango wote wa Neymar wa kuhama kwenye dirisha hili la majira ya kiangazi utakufa endapo Rais wa PSG, Nasser Al-Khelaifi na mshauri wa michezo, Luis Campos watamteua Enrique kuwa kocha wao mpya baada ya kuachana na Christophe Galtier.
L'Equipe linaripoti taarifa za Enrique kuhusishwa na PSG zimembadili mawazo Neymar na kuamini miamba hiyo ya Paris itakuwa kwenye kiwango bora kabisa msimu ujao kama Mhispaniola huyo atapewa kazi.
Neymar alicheza kwa mafanikio chini ya Enrique walipokuwa pamoja huko Barcelona kwa miaka mitatu kati ya mwaka 2014 na 2017. Neymar alishinda taji moja la Ligi ya Mabingwa Ulaya wakati alipokuwa chini ya kocha huyo na alibeba mataji mawili ya La Liga alipokuwa huko Nou Camp.
PSG wanahangaika kusaka taji la Ligi ya Mabingwa Ulaya na wamekuwa wakifanya usajili wa maana akiwamo Neymar mwenyewe kwa ajili ya jambo hilo, huku wakiamini Enrique anaweza kuja kufanya kisichoshindikana.