Mashabiki wa Yanga
Rais wa Klabu ya Yanga, Eng. Hersi Said amewashukuru wazee wa Yanga kwa kufanikisha Wazee Day kwenye mchezo wa dabi dhidi ya Watani zao Simba Sc ambapo Wananchi walitakata kwa ushindi wa bao 2-1.
Hersi amesema hayo jana wakati akizungumza na wazee hao kuwapa pongezi kutokana na maombi yao, dua zao na sapoti yao kwenye mchezo huo.
"Tuliwapa kazi Aprili 20, 2024 na mazungumzo yalikuwa makubwa kutoa jina kwenye hiyo mechi, lakini wapo wachezaji walikuwa wanataka jina lao liwepo kwenye hiyo mechi lakini ikafikia siku iitwe Wazee Day na mliifanyia kazi na kwenye historia kubwa imefuatiliwa hiyo mechi.
“Tunawashukuru wazee wetu, mechi iliisha kwa amani na tulipata matokeo, lakini kubwa zaidi tupo kwenye hatua nzuri ya kutwaa Ubingwa kwa Mara 30 wa Ligi na tupo kwenye hatua ya Robo Fainali Kombe la FA.
“Lakini ukiwa na wazee ni jukumu kubwa la kuliombea Serikali na Rais wa nchi Mama Samia Suluhu Hassan kuongoza vizuri nchi. Nawashukuru wazee kwa kuisaidia timu kuiombea kila siku na nachukua fursa kuwashukuru wazee wote hapa nchini kwa kutuombea kila siku nawashukuru.
“Tumeandaa utaratibu wa usafiri na tiketi leo (jana) tukutane jioni kwenye mchezo wa Robo fainali dhidi ya Tabora United,” amesema Hersi Said.