Duh! Ferguson amkataa Rashford Kimtindo

Kocha za wa zamani wa Manchester United, Sir Alex Ferguson amesema Manchester United inatakiwa kusajili straika dirisha lijalo la majira ya kiangazi kwa sababu Marcus Rashford sio mshambuliaji halisi.

Ferguson ambaye aliipa mafanikio makubwa Man United na kuifanya itambe Ulaya alikuwepo katika Uwanja wa Wembley wakati Man United inapata ushindi wa mabao 2-0 katika mchezo wa fainali ya Carabao dhidi ya Newcastle United.

Ferguson ambaye ni raia wa Scottland, alishinda mataji 13 ya Ligi Kuu ya England wakati anaifundisha timu hiyo na amesema licha ya Rashford kufunga mabao 25 ya michuano yote msimu huu, bado wachezaji wengine pia kwenye safu ya ushambuliaji wanatakiwa kufanya kama yeye kwa kwa sababu timu hiyo haina straika bora kwa sasa.

‘Sifkirii kwamba Rashford ni straika. Amekuwa akicheza sana akitokea upande wa kushoto ingawa amekuwa akionyesha kiwango bora. Namna anavyomalizia ni vizuri. Mashuti yake pia humpa nafasi kubwa ya kufunga. Naweza kusema ni mchezaji mzuri aliye kwenye nyakati zake bora. Ubaya ni kwamba yeye ndiye chanzo na tegemeo letu kwenye ufungaji. Nafikiri tunahitaji straika ingawa yeye anatupa mabao,” alisema.

Ferguson anakumbukwa kwa kazi kubwa aliyoifanya katika kuendeleza vipaji vya mastaa kwenye miaka aliyohudumu katika timu hiyo akiwakuza Cristiano Ronaldo na Wayne Rooney ambao ni miongoni mwa wachezaji bora kuwahi kutokea kwenye kikosi hicho.

Man United imekuwa ikihusishwa na mastraika kibao kuelekea dirisha lijalo la majira ya kiangazi na miongoni mwao ni pamoja na Harry Kane wa Tottenham Hotspur na Victor Osimhen anayekipiga Napoli.