Dodoma Jiji kuwakosa watatu dhidi ya Azam

Dodoma Jiji itawakosa nyota wake watatu katika mchezo wa Kombe la Azam Sport Federation (ASFC) dhidi ya Azam FC kesho Januari 27 saa 1 usiku katika uwanja wa Azam Complex jijini Dar es salaam.

Dodoma Jiji ilipata nafasi hiyo mara baada ya kuifunga TMA ya Jijini Arusha inayoshiriki First League kwa mikwaju 4-3 katika mchezo uliofanyika katika uwanja wa Jamhuri mjini Dodoma.

Mchezo huo ulimalizika kwa timu hizo kutofungana ndipo zilipoenda kwenye mikwaju ya Penalti na Dodoma Jiji kuibuka na ushindi huo.

Azam wamepata nafasi hiyo mara baada ya kuifunga Malimao FC ya Katavi kwa mabao 9-0 katika uwanja wa Azam Complex Dar es salaam.

Mabao ya Azam FC katika mchezo huo yalifungwa na Sospeter Bajana, Shaaban Iddi Chilunda, Keneth Muguna, Kipre Junior, Abdul Suleiman ‘Sopu’ mawili, Yahya Zayd, Cyprian Kachwele na David Chilawanga.

Kocha wa timu hiyo,Melis Medo amewataja wachezaji watakaokosa mchezo huo ni Christian Zigar,Cyprian Kipenye na Jimmy Shoji kutokana na kuumia.

Amesema wachezaji hao waliumia katika michezo ya Ligi Kuu Bara.

Medo amesema wamejipanga kupata matokeo katika mchezo huo huku akitabiri utakuwa mgumu kutokana na ubora wa wapinzani wao.