Daktari Real Madrid atupiwa virago

Klabu ya Real Madrid imeripotiwa kumfuta kazi Afisa wake mkuu wa madaktari Niko Mihic kwa mujibu wa ripoti.

Kwa mujibu wa Gazeti la Marca, klabu hiyo ya Hispania imekuwa na hofu juu ya wachezaji kukumbwa na majeraha mara kwa mara.

Chanzo kikuu cha ndani ya klabu kimeshangazwa na jinsi Mihic alivyoshughulikia majeraha ya Arda Guler, kiungo huyo kinda ambaye alisajiliwa kwenye dirisha la usajili la kiangazi. Tangu alipotua kinda huyo hajacheza mechi akiwa na uzi wa Madrid kutokana na majeraha yanayomkabili kwa muda mrefu jambo ambalo limeleta hofu.

Kumekuwa na maswali mengi mengi ya majeraha ya wachezaji wa Madrid msimu huu kwani imekiathiri kikosi cha Carlo Ancelotti kwa sababu kina mashindano mengi.

Kipa Thibaut Courtois na beki Eder Militao wote walipata majeraha ya kufanana mapema na wameendelea kukaa nje ya dimba kwa muda mrefu.

Kwa kuongeza, Vinicius Junior, David Alaba na Ferland Mendy walikuwa nje ya dimba kwa muda mrefu kabla ya kurejea dimbani.