Chelsea yamuwinda Alexander Isak

Klabu ya Chelsea imevutiwa na straika wa Newcastle United, Alexander Isak na inataka kumsajili katika dirisha hili la majira ya kiangazi lakini itatakiwa kulipa zaidi ya Pauni 115 milioni kwa ajili ya kufanikisha dili hilo, inaeleza tovuti ya Daily Mail.

Mara kadhaa imekuwa ikielezwa kwamba Newcastle inataka kuuza baadhi ya wachezaji wake muhimu katika dirisha hili lakini sio Alexander, lakini hiyo haijazirudisha nyuma timu nyingi kubwa barani Ulaya ambazo zinahitaji huduma yake.

Mbali ya Chelsea iliyoonekana kuingia katika dili hilo hivi karibuni, Arsenal imekuwa ndio kinara kutajwa kwamba inafanya mchakato wa kumpata na tetesi za kuhusishwa naye zilianza kabla ya msimu kumalizika.

Staa huyu wa kimataifa wa Sweden ambaye mkataba wake unamalizika mwaka 2028, amevutia timu nyingi kutokana na kiwango bora alichoonyesha msimu uliopita ambapo alicheza mechi 40 za michuano yote na kufunga mabao 25.

Alifunga mabao makali ya uwezo binafsi msimu uliopita akisepa na kijiji na kumfanya nyota huyo mwenye asili ya taifa la Eritrea lililopo barani Afrika kuwa mmoja washambuliaji wanaoogopwa EPL kutokana na uwezo wake wa kufunga na kuwatoka mabeki.