Chelsea kufanya ujanja kwa Lukaku

Chelsea inaripotiwa kufikiria kupiga ndege wawili kwa jiwe moja ikiwamo kumhusisha straika Romelu Lukaku kwenye dili la kubadilishana na Dusan Vlahovic wa Juventus.

Chelsea kwa sasa ipo kwenye mchakato wa kuondosha mastaa isiowahitaji ili kumpa nafasi kocha mpya Mauricio Pochettino nafasi ya kuunda timu yake.

Miongoni mwa wachezaji wanaodaiwa watafunguliwa mlango wa kutokea ni straika, Lukaku. Straika huyo wa Kibelgiji, 30, alitumikia msimu uliopita kwa mkopo huko Inter Milan na anataka kujiunga jumla kwenye kikosi hicho chenye maskani yake San Siro.

Chelsea imegoma kukubaliana na ofa ya Inter Milan ya kuendelea namchezaji huyo kwa mkopo, huku Lukaku mwenyewe akigomea ofa ya pesa ndefu kutoka Saudi Arabia.

Lakini, sasa Chelsea baada ya kusikia Juventus inahitaji saini ya Lukaku, wanadhani hiyo ni fursa kwao kwanza ya kuachana na straika huyo, lakini pili wakitaka kumtumia kama chambo cha kubadilisha na straika Dusan Vlahovic ili aje kukipiga Stamford Bridge.