Chanongo ana ramani ya Pamba Ligi Kuu

Pamba Jiji ina mechi tatu za kuvunja mwiko wa kutopanda Ligi Kuu kwa zaidi ya miaka 20 sasa, huku staa wake, Haruna Chanongo akifichua kitakachowabeba na kutimiza ndoto iliyosubiriwa muda mrefu na wana Mwanza.

Timu hiyo ambayo ipo nafasi ya pili kwenye Championship kwa pointi 58 nyuma ya vinara Ken Gold wenye alama 61, imebakiwa na mechi tatu dhidi ya FGA Talents, TMA na Mbuni.

Chanongo ambaye ni kinara wa mabao kikosini humo (11), alisema wachezaji wameshakula kiapo cha kuipandisha timu na ushirikiano wa ndani na nje ya uwanja ni njia za kuwafikisha kwenye mafanikio.

Mkongwe huyo aliongeza, katika michezo iliyobaki hawahitaji sare wala kupoteza bali kuvuna alama tisa ambazo zitawahakikishia kucheza Ligi Kuu msimu ujao.

“Wachezaji tuna ari, morali na hamasa kubwa na matarajio yetu ni kupanda Ligi Kuu, hizi mechi tatu zikiwamo mbili za ugenini hatutaki sare wala kupoteza,” alisema na kuongeza;

“Ushirikiano uliopo ndani na nje ya uwanja unatufanya kuwa na nguvu kwani hamasa ipo na sisi wachezaji tumeazimia kuifia Pamba Jiji kuhakikisha inakata kiu ya muda mrefu,” alisema straika huyo.

Kuhusu kasi yake ya kufunga mabao, Chanongo alisema; “Malengo yangu hayajafikiwa vile ninavyohitaji mimi, mabao bado hayajatosha vile nilivyopanga, kwenye mbio za ufungaji bora lolote linaweza kutokea.”

Kocha msaidizi wa Pamba, Renatus Shija alisema ufungaji wa mabao ndani ya kikosi hicho hauji bahati mbaya bali ni kutokana na mipango na mazoezi wanayofanya.