Chama: Simba, Yanga zinatoboa

Beki wa zamani wa Yanga na Pan African, Rashid Iddy ‘Chama’ amesema timu za Simba na Yanga zitafanya vizuri dhidi ya wapinzani wao wa kimataifa.

Yanga itavaana na El Merrikh ya Sudan kwenye Uwanja wa Kigali Pele (zamani Nyamirambo), jijini Kigali wakati, Simba itamenyana na Dynamos ya Zambia mechi zote zikipigwa kuanzia saa 10:00 jioni kabla ya kurudiana wiki ijayo jijini Dar es Salaam na mshindi wa jumla kutinga makundi.

Mbali michezo hiyo Jumapili Singida Big Stars itacheza dhidi ya Future ya Misri kwenye mchezo wa raundi ya pili ya Kombe la Shirikisho Afrika mechi itakayopigwa Azam Complex.

Chama aliyecheza Afcon mwaka 1980 Tanzania ilipofuzu Afcon kwa mara ya kwanza alisema kwa namna timu zote zilizofanya maandalizi na aina ya wachezaji ilizonazo, anaona kabisa zikitoboa ugenini.

“Mechi za kwanza ndio zinatoa picha cha msingi, naamini zimejipanga vyema kupata matokeo mazuri kwa zinazocheza ugenini na hii ya nyumbani (Singida) ili kuweza kujitengenezea mazingira ya kusonga na kuandika historia ya kutinga makundi kwa timu zote tatu,” alisema Chama.

Mkongwe huyo alisema kwa sasa mambo yamebadilika na soka la Tanzania limepiga hatua, kiasi timu zetu hazitishiki tena kucheza ugenini tofauti na zamani.