Chadrack Boka ni Mwananchi

Klabu Yanga imethibitisha usajili wa mlinzi wa kushoto Chadrack Boka kutoka klabu ya Fc Lupopo ya DR Congo

Ilikuwa ni suala la muda kwa Yangaa kumtambulisha Boka aliyetua kuchukua nafasi ya Joyce Lomalisa.

Boka alikuwa mchezaji tegemeo katika kikosi cha Lupopo na pia amepata nafasi ya kuitumikia timu ya Taifa ya DR Congo katika michuano ya CHAN.

Unaweza kusema Yanga imetoa chuma upande wa kushoto na imeshusha chuma kwelikweli.

Boka mwenye umri wa miaka 24 anasifika kwa kasi ya kupandisha mashamulizi na umahiri katika ulinzi.

Anakuwa mchezaji wa tatu kutambulishwa katika dirisha hili baada ya Clatous Chama na Prince Dube.

TAARIFA YA YANGA;

"TUMEKAMILISHA usajili wa beki wa kushoto Chadrack Issaka Boka kutoka FC Saint Eloi Lupopo ya nchini DR Congo.

Beki huyo mwenye umri wa miaka 24 ambaye ni mzaliwa wa Kinshasa nchini DR Congo, anakuja kuimarisha eneo la ulinzi upande wa kushoto akisaidiana na Nickson Clement Kibabage.

Ubora wa beki huyo hauna mashaka kutokana na kwamba ndani ya kikosi cha FC Saint Eloi Lupopo alikuwa panga pangua kikosi cha kwanza.

Nyota huyo pia amekuwa akiitumikia Timu ya Taifa ya DR Congo ambapo alijumuishwa kwenye kikosi kilichoshiriki michuano ya Kombe la Mataifa Afrika kwa Wachezaji wa Ndani (CHAN) iliyofanyika Algeria mwaka 2022.