Bosi Yanga: Anachokitaka Gamondi bado!

Meneja wa Klabu ya Yanga, Walter Harson amesema kuwa licha ya kikosi chao kufanya vizuri, lakini bado hakijapata muungano ambao mwalimu anautaka, hivyo mashabiki wa timu hiyo wawe wavumilivu kwani mambo mazuri yanakuja.

Walter Harson amesema hayo wakati akihojiwa na Yanga TV baada ya kupata ushindi mnono katika mechi nne mfululizo za mashindano rasmi na kufanikiwa kufunga bao 17 na kuruhusu bao 1 pekee.

"Wananchi sasa hivi wanafurahi na tuna imani kabisa kwa hichi ambacho kinaendelea sasa hivi kinaweza kikawa kinaashiria mengi makubwa zaidi

"Sasa hivi tunapata ushindi mzuri lakini timu bado haijakaa vizuri, vipi kama sasa timu ikikaa vizuri watu wakiwa wanazoeana vizuri? tunategemea mambo makubwa zaidi ya haya," amesema Walter Harson.

Yanga ambao ni mabingwa watetezi wa Ligi Kuu ya NBC sasa wanajiandaa dhidi ya Al Merreikh kwenye mchezo wao Ligi ya Mabingwa Afrika utakaopigwa nchini Rwanda, Septemba 16, mwaka huu.