Bora Robertinho kuliko Benchikha - Shabiki Simba

Shabiki maarufu wa Klabu ya Simba, anayefahamika kwa jina la Mchome amesema kuwa mpaka sasa haelewi staili ya uchezaji wa soka analofundisha Kocha wa Simba, Abdelhak Benchikha.

Mchome amesema kuwa, kipindi cha kocha Mbrazil RObertinho ilikuwa ikicheza 'direct football' soka la kushambulia na kupata matokeo, lakini kwa Benchikha bado haielewi jambo analoona linaikwamisha timu hiyo kwenda mbele.

“Pira la timu ya Benchikha ni bovu bora hata Robertinho, mpira hauvutii kabisa, ninashindwa kuelewa ni wachezaji wameshindwa kuingia kwenye mfumo wa Benchikha au Benchikha ameshindwa kuingia kwenye mfumo wa wachezaji?

“Haieleweki mpaka leo wanacheza mfumo gani, kwenye kushambulia ni wachache, kukaba wanaenda wachache. Simba hatukuwa na tatizo la kuzuia, lakini wachezaji wanawaangusha makocha. Dirisha dogo wamesajiliwa wachezaji kama sita lakini mpaka sasa wanaocheza ni wa kimataifa tu, wazawa hakuna hata mmoja.

“Mfumo wa Benchikha ni mgumu kwa sababu mpira umetoka mguuni mwa wachezaji wa Simba umehamia mdomoni kwa msemaji, ndicho kilichobaki. Mpaka sasa msemaji anaongoza Ligi Kuu na Jwaneng Galaxy ameshakufa tatu,” amesema Mchome.