Biashara Utd ni wao na Nkane

Biashara United ina hesabu kali za kushinda mechi mbili za mtoano ‘Play Off’ dhidi ya Tabora United ili kurejea Ligi Kuu na muda huohuo imekuwa kwenye hesabu za usajili.

Wakali hao kutoka Mara wanaamini msimu ujao timu yao itacheza Ligi Kuu na tayari wameanza maandalizi ambapo Winga wa Yanga, Denis Nkane ni miongoni mwa mastaa wanaowapigia hesabu.

Biashara iliyoshuka daraja mwaka 2022, inatarajia kutuma maombi Yanga ya kumpata Nkane kwa mkopo kama itapanda daraja tena.

Ikumbukwe Wanajeshi wa Mpakani hao ndio waliomtambulisha Nkane kwenye soka la ushindani baada ya kuwatumikia msimu wa 2021/22 kabla ya kutimkia Yanga hivyo wanaamini wanaweza kumpata tena staa huyo anayesugua benchi Yanga.