Benzema awabwaga Messi, Ronaldo

Karim Benzema amewatema Cristiano Ronaldo na Lionel Messi katika kikosi chake bora cha mastaa wa soka na kushangaza mashabiki.

Straika huyo wa zamani Real Madrid anayekipiga Al-Ittihad, aliwahi kucheza na Ronaldo hata hivyo cha kushangaza hakumjumuisha kwenye kikosi chake bora.

Benzema alitimkia Saudi Arabia baada ya kunyakua Tuzo ya Ballon d’Or katika usajili uliopita, ameendelea kukiwasha huko licha ya kuwa na umri wa miaka 35.

Aidha Benzema ametaja kikosi chake kikali akiwajumuisha mastaa wakongwe wa soka huku Messi na Ronaldo wakikosekana licha ya kufanya mambo makubwa kwenye soka.

Katika kikosi hicho hakushangaza kuona baadhi ya wachezaji wa kimataifa wa Ufaransa ni miongoni waliopenya.

Akizungumza na chaneli ya mitandao ya kijamii ya klabu ya Al Ittihad, Benzema aliwataja Manuel Neuer, Dani Alves, Pepe, Sergio Ramos, Marcelo; Claude Makelele, Paul Pogba, Zinedine Zidane, Ronaldinho, Ronaldo de Lima (R9) na Karim Benzema.

Benzema alijiunga na Real mwaka 2009 kipindi cha usajili wa kiangazi na kushinda mataji manne ya Ligi Mabingwa Ulaya pamoja na Ronaldo, hata hivyo hakuweka wazi sababu ya kumtema kwenye kikosi chake.

Mashabiki walishangazwa na uamuzi wa Benzema, kwani mastaa hao wanatambulika dunia kama wachezaji bora wa muda wote, kutokana na mafanikio waliyopata licha ya upinzani mkali kati yao.

Hivi karibuni Benzema alikuwa na mgogoro na kocha wa zamani wa Al-Ittihad, Nuno Espírito Santo hata hivyo, ametimuliwa na mabosi wa klabu hiyo. Inadaiwa kocha huyo alikuwa hamtendei haki Benzema kwani alikuwa akimweka benchi mara kwa mara.