Karim Benzema
Karim Benzama alianza vizuri maisha yake ya soka nchini Saudi Arabia kwa kukaribishwa na zaidi ya mashabiki 60,000 ndani ya Uwanja wa Al-Ittihad huku fataki zikirushwa angani.
Mshindi huyo wa tuzo ya Ballon d'Or aliondoka Real Madrid baada ya kudumu kwa miaka 14 huku akiwa na mafanikio kibao.
Mfaransa huyo alipokewa kwa shangwe la aina yake wakati alipotambulishwa mbele ya uwanja uliojaza umati wa mashabiki wa timu hiyo.
Benzema alifichwa gizani kabla ya taa kuwashwa uwanjani, na fowadi huyo alikuwa amevalia jezi ya Al-Ittihad yenye namba 9 mgongoni jambo ambalo liliibua shangwe za mashabiki.
Mshambuliaji huyo mwenye umri wa miaka 35 alijivunia kujiunga na timu hiyo iliyobeba ubingwa wa Ligi Kuu Saudia baada ya kuipiku timu ya Cristiano Ronaldo, Al-Nassr kwa tofauti ya pointi tano.
Benzema, 35, aliripotiwa kupewa ofa ya Pauni 342 milioni ili ajiunge na timu hiyo baada ya kuishi Hispania kwa miaka 14, amapo aliamua kuachana na wababe wa michuano ya Ligi ya Mabingwa Ulaya.
Akizungumzia sababu za kuhama, Benzema alisema: "Kwa sababu mimi ni Mwislamu na ni nchi ya Kiislamu. Nimekuwa nikitamani kuishi huku. Niliwahi kuja Saudi Arabia na ninajisikia vizuri. Nipo sehemu sahihi. Natumaini nitaleta mafanikio na tutabeba mataji."
Mbali na mkataba wa kucheza Al-Ittihad, Benzema anatarajiaa kupokea ada ya ziada ili kuwa balozi wa kushawishi ombi la Saudi Arabia kuomba kuwa mwenyeji wa Kombe la Dunia 2030.
Real Madrid ilimuandalia Benzema hafla fupi ya kumuaga iliyohudhuriwa na rais wa klabu hiyo, Florentino Perez. Nyota huyo alishinda mataji manne ya LaLiga, matano ya Ligi ya Mabingwa Ulaya na matatu ya Copa del Rey. Alifunga mabao 354 katika mechi 648 akiwa na wababe hao wa Hispania, huku akiwa na asisti 165.
BENZEMA ATAKAVYOLIPWA HUKO SAUDI ARABIA
-Pauni 171,877,300 kwa mwaka -Pauni 14,323,107 kwa mwezi -Pauni 3,580,776 kwa wiki -Pauni 511, 539 kwa siku -Pauni 21,313 kwa saa -Pauni 355 kwa dakika -Pauni 5.91 kwa sekunde