Bellingham azawadiwa ndinga ya Sh478 milioni

Staa wa Real Madrid amezawadiwa gari aina ya BMW lenye thamani ya Pauni 155,000 sawa na zaidi ya Sh478milioni za Kitanzania.

Staa huyo wa kimataifa wa England amekuwa na wakati mzuri kwenye kikosi cha Madrid tangu ajiunge nao msimu huu ambapo amefunga mabao 10 kwenye mechi tisa.

Mbali ya raha anazopata kwa kufunga, Bellingham pia ana maisha mazuri nje ya uwanja kwani hivi karibuni amezawadiwa pia ndinga na Madrid ambao wamewapa wachezaji wao wote gari aina ya BMW XM zinazotumia umeme ikiwa ni baada ya kuingia mkataba wa udhamini na kampuni hiyo.

Madrid imewapa wachezaji wao gari hizo ili kurahisisha safari zao za kuhudhuria mazoezi ziwe rahisi zaidi kwani zina spidi ya kutosha na kumfanya mpandaji kuwa na utulivu.

Katika taarifa iliyotolewa na timu hiyo ilisema kwamba; "Timu ya wakubwa imepokea magari aina ya BMW katika hafla iliyofanyika kwenye mji wa Real Madrid,"