Baraka Gamba Majogoro
Baada ya kiungo, Baraka Majogoro kukamilisha dili lake la kujiunga na klabu ya Chippa United ya Afrika Kusini, nyota wenzake, Abdi Banda amempa mchongo wa kutusua kwenye soka la nchi hiyo.
Majogoro amekamilisha dili hilo baada ya kuwavutia mabosi wa timu hiyo wakati alikoenda kwenye majaribio ya wiki mbili hivyo kuachana rasmi na timu ya KMC aliyokuwa anaichezea msimu ulioisha.
Akizungumza na Mwanaspoti kutoka Afrika Kusini, Banda alisema ni jambo jema kuona nyota huyo amejiunga na timu hiyo huku akimtaka kuzingatia nidhamu na kujituma zaidi ili kufikia malengo.
“Unapocheza nje ya nchi ni tofauti na ulipozoea hivyo kwangu namshauri azingatie zaidi kazi yake uwanjani kwa sababu atakutana na hali kama ya ubaguzi ila isimfanye kutoka mchezoni,” alisema.
Aidha Banda aliongeza tunapokuwa na wachezaji wengi wanaocheza nje inasaidia sana kutupa mwanga kwani tunakutana na mastaa mbalimbali wanaotupatia uzoefu ambao huleta faida kwetu kama nchi.
Banda kabla ya kujiunga na Richards Bay aliichezea Chippa aliyopo Majogoro ila migogoro ya kimaslahi baina yake na viongozi wa timu hiyo ilimfanya kuondoka. Pia alishacheza Baroka na Higlands Park pia za Afrika Kusini mbali na Simba, Coastal Union na Mtibwa alizozitumikia hapa nchini.