Auba ngoma ngumu

Chelsea haipo tayari kuachana na straika Pierre-Emerick Aubameyang ambaye ameonyesha nia ya kutaka kurejea Barcelona.

Straika huyo alijiunga na Chelsea tangu Septemba, mwaka jana, lakini tangu alipotua Darajani mambo yamekuwa magumu kwa upande wake msimu huu.

Ikumbukwe kwamba uhamisho wa straika huyo wa zamani wa timu ya taifa ya Gabon wa kurejea Barcelona uligonga mwamba dirisha la usajili la kingazi lililopita sambamba na Inter Milan iliyomtaka.

Kwa mujibu wa ripoti, Aubameyang hatauzwa Barcelona dirisha la usajili la kiangazi kwa sababu bado yupo katika mipango ya kocha Graham Potter.

Taarifa nyingine iliyotolewa ni kwamba, Chelsea imegoma kukubali matakwa ya Aubameyang ya kujiunga na Barcelona kwa sababu alionyesha dharau dhidi yao. Chelsea ilichukizwa na kitendo cha straika huyo kuonekana akiwa na wachezaji wa Barcelona akishangilia ushindi wa El Classico baada ya Real Madrid kuchezea kichapo cha mabao 2-1 mwezi huu.

Vilevile inaripotiwa kwamba bado Chelsea haijaridhika na kiwango cha Aubameyang tangu alipotua akitokea Barcelona.

Mara ya mwisho Aubameyang kucheza ilikuwa dhidi ya Tottenham Hotspur na aliingia akitokea benchi pale Chelsea ilipopokea kichapo mabao 2-0.

Mechi yake kwanza ambayo alipangwa kikosi cha kwanza ilikuwa dhidi ya Arsenal katika Ligi Kuu England iliyopigwa Novemba, mwaka jana.