Marco Asensio
Winga wa kimataifa wa Hispania Marco Asensio ambaye alikua anakipiga ndani ya klabu ya Real Madrid ametangaza kuondoka ndani ya klabu hiyo baada ya kudumu kwa muda wa takribani miaka nane.
Marco Asensio anaondoka ndani ya klabu ya Real Madrid kwa uhamisho huru baada ya mkataba wake kumalizika na kutokuongeza na kuamua kuondoka bure klabuni hapo, Huku vilabu mbalimbali vikiwa vinawania huduma ya mchezaji huyo mwenye ufundi mwingi.
Klabu ya PSG inaelezwa kukubaliana na mchezaji huyo kwenye maslahi binafsi tayari na kuna kila dalili mchezaji huyo akajiunga na mabingwa hao wa Ufaransa, Mchezaji huyo mapema leo ameweza kuaga mashabiki wa Real Madrid kupitia kurasa zake za mitandao ya kijamii.
Marco Asensio atakumbukwa kama moja ya wachezaji wenye mafanikio ndani ya klabu ya Real Madrid, Kwani mchezaji huyo amekua kwenye kikosi cha dhahabu cha klabu hiyo mwaka 2017 na 2018 ambacho kilifanikiwa kushinda kila taji ambalo walilishindania.
Winga Marco Asensio anaondoka ndani ya Real Madrid akiwa amehusika kwenye mabao 93 kwani alifanikiwa kufunga mabao 61 huku akipiga pasi 32 ambazo zilisaidia upatikanaji wa mabao, Lakini vilevile winga huyo alifanikiwa kutwaa mataji 17 ndani ya klabu hiyo na kua moja ya wachezaji waliotwaa mataji mengi klabuni hapo.