Arteta atoa mchongo wa ubingwa Arsenal

Kocha Mikel Arteta amewadokeza mambo ya kufanya mastaa wake kama wanataka kubeba ubingwa wa Ligi Kuu England msimu huu.

Kocha huyo alifurahia kupata pointi moja ilipomenyana na Liverpool kwenye Uwanja wa Anfield, katika mechi ya mchuano mkali wa kuwania nafasi ya kwanza kwenye msimamo wa Ligi Kuu.

Hata hivyo kocha huyo kutoka Hispania, amefichua kile ambacho timu yake inahitaji kufanya katika raundi ya pili ya kampeni ya ubingwa wa msimu huu, ili kudumisha nafasi yao kileleni, hatimaye kubeba ubingwa.

Akizungumza na waandishi wa habari, Arteta alisema, “Ndio bila shaka kuna mambo fulani ambayo tunapaswa kuboresha. Hasa kumaliza mechi haijaishi ina ugumu kwa kiasi gani, wakati mwingine matokeo yametunyemelea kwa ukaribu sana, lakini tumeonyesha kiwango kizuri bila ya wachezaji wetu watano muhimu. Hilo ni jambo tunalopaswa kudumisha.”

Mabeki wa Gunners William Saliba na Gabriel Magalhaes walikuwa katika kiwango bora zaidi, kwani waliweza kuzuia mashambulizi ya Liverpool ambayo mengi yalitokea pembeni.

Beki wa Brazil, Magalhaes ndiye alikuwa mfungaji wa bao la kuongoza kwa upande wa Arsenal kwa mpira wa adhabu uliopigwa kwa kichwa na Martin Odegaard, kabla ya Mohamed Salah kusawazisha katika dakika ya 24 ya mtanange huo, kutokana na kazi nzuri aliyofanya Trent Alexander-Arnold.