Arteta, Ten Hag kila mtu na wake

Dirisha la Januari limebakiza muda usiozidi miezi miwili na bila ya shaka makocha Erik ten Hag na Mikel Arteta watakuwa bize kusaka mastaa wa kuwaongeza kwenye vikosi vyao ili kuwa na makali zaidi.

Kocha Ten Hag mambo yake yamekuwa magumu huko Manchester United na hali inavyojionyesha hadi sasa msimu huu, ni wazi atalazimika kuingia sokoni kwenye dirisha la Januari kunasa wakali wapya.

Arteta na kikosi chake cha Arsenal kimekuwa kwenye ubora mkubwa, lakini bado kuna wachezaji wanahitajika kutua Emirates ili kuipa timu hiyo nguvu ya kushindania mataji.

Man United inataka kumpiga bei Jadon Sancho kwenye dirisha la Januari ili kumsajili mkali wa Brighton, Solly March. Mambo yalivyo, Sancho haonekani kuwa na maisha chini ya Ten Hag, hivyo mlango wa kutokea utamhusu na kinachoelezwa, Solly March atatua kuziba pengo lake hiyo Januari.

Kingine, Ten Hag atamuuza Anthony Martial ili kumsajili Serhou Guirassy.

Martial amekuwa akisumbuliwa sana na majeraha, na mchezaji anayemtaka, Guirassy, bei inayoripotiwa kuwa Pauni 15 milioni. Amekuwa na kiwango kizuri huko VfB Stuttgart.

Mpango mwingine wa Man United kwenye dirisha la Januari ni kumuuza kiungo wa Kidachi, Donny van de Beek na baada ya hapo itavamia Atalanta kwenda kuinasa saini ya kiungo, Teun Koopmeiners, ambaye wanaamini atakuwa na msaada mkubwa kwenye kikosi ili kuwa moto na kutimiza malengo ya kuwamo kwenye timu za juu kwenye msimamo wa Ligi Kuu England msimu huu.

Kocha Arteta naye atakuwa bize kukiboresha zaidi kikosi chake cha Arsenal wakati dirisha hilo la usajili wa Januari litakapofunguliwa.

Arteta anataka kumtoa kwa mkopo Emile Smith-Rowe ili atoe nafasi ya kumsajili straika wa Brentford, Ivan Toney kuja kufanya kazi moja ya kupasia nyavu, huku mpango mwingine ni kumuuza kiungo Mohamed Elneny ili amsajili Pedro Neto wa Wolves.

Arteta atamtoa kwa mkopo pia Reiss Nelson, ili amsajili Konrad Laimer, staa wa Bayern Munich, ambaye amekuwa moto kwelikweli kwenye sehemu ya kiungo.

Arsenal inahitaji kujiimarisha zaidi kwenye eneo la kiungo licha ya kutoa pesa nyingi kunasa saini ya Declan Rice kwenye dirisha lililopita la uhamisho wa majira ya kiangazi. Hiyo Januari patachimbika.