Arsenal kumchukua Douglas Luiz fasta

Arsenal imeonyesha dhamira ya dhati ya kwenda kunasa huduma ya kiungo wa Aston Villa, Douglas Luiz kutoka Aston Villa, imeelezwa.

Miamba hiyo ya Emirates ilijaribu kumsajili kiungo huyo kwenye dirisha la majira ya kiangazi la mwaka jana, lakini ilishindwa kuwashawishi Aston Villa baada ya ofa zao mbili, ya kwanza ya Pauni 25 milioni na ya pili Pauni 30 milioni kugomewa.

Aston Villa inahitaji zaidi ya Pauni 42.5 milioni kwenye mauzo ya supastaa wao huyo wa Kibrazili. Lakini, kwa sasa Arsenal inataka kutumia fursa ya Aston Villa kuhitajika kuuza wachezaji ili kuendana na bajeti yao kuhusu mapato na matumizi kukwepa adhabu ya Ligi Kuu England.

Arsenal inataka kutumia hiyo kama silaha ya kumnyakua Luiz, ambaye aliitumikia Aston Villa kwenye mechi 35 za Ligi Kuu England, akisaidia timu hiyo kufuzu kucheza Ligi ya Mabingwa Ulaya kwa mara ya kwanza tangu 1983.

Mkataba wa kiungo huyo huko Villa Park utafika tamati 2026, na wakati alipokuwa na mpango wa kusaini mkataba mpya mwezi uliopita, mazungumzo ya dili jipya yamekwama. Na ripoti zinafichua kwamba Aston Villa wanamthaminisha Luiz kuwa na thamani ya Pauni 42.5 milioni.

Arsenal inatafuta namna ya kujiweka sawa kwa ajili ya msimu ujao baada ya kuachana na mastaa 19, huku viungo ambao wanaweza kufunguliwa mlango wa kutokea ni pamoja na Albert Sambi Lokonga, Thomas Partey na Fabio Vieira.

MAVITU YA DOUGLAS LUIZ KWENYE LIGI KUU ENGLAND 2023-24

-Amecheza: Mechi 35

-Ametengeneza: Nafasi 53

-Amepiga: Pasi 1,973

-Amefunga: Mabao 9

-Ametoa: Asisti 5

-Amelala: Takolini 58