Arsenal bado ina tatizo hili

Licha ya kuibuka na ushindi wa mabao 3-1 mbele ya Liverpool, wachambuzi na waandishi mbalimbali wamemchana Kocha wa Arsenal na mchezaji wake, Martin Odegaard kutokana na jinsi walivyoshangilia ushindi huo.

Mchambuzi kutoka kituo cha TV cha BeinSports, Richard Keys alisema Mikel Arteta alitakiwa kuacha utoto kwa jinsi alivyokuwa akishangilia wakati mabao yanaingia.

"Walikuwa na haki ya kushangilia kwa sababu wameshinda mechi ambayo imewaweka kwenye nafasi nzuri katika mbio za ubingwa, lakini nilitamani kuona Arteta akionyesha tabia nzuri zaidi. Amerudia tabia zake zile alizowahi kuwa nazo hapo nyuma."

Baada ya bao la tatu kuingia Arteta alikuwa akikimbia huku na kule hadi kwenye benchi la ufundi la Liverpool.

Wakati Arteta anafanya hivyo, nahodha wao Odegaard yeye alikuwa na namna yake ya kipekee ambayo pia ilichefua baadhi ya watu.

Odegaard alionekana akiwa na mpigapicha wa Arsenal huku yeye ndio akiwa anampiga picha.

Baaada ya picha hizo kusambaa mchambuzi wa Sky Sports Jamie Carragher, kupitia ukurasa wake wa X amesema staa huyo alikuwa amefanya jambo la ajabu na yeye hakuona haja ya kufanya hivyo, anaamini baada ya kupata ushindi kama huo Odegaard alitakiwa kuondoka uwanjani na kwenda kwenye vyumba vya kubadilishia nguo.