Arsenal, Man United zapigana vikumbo kwa Brahim Diaz

Imefahamika kuwa Klabu za Arsenal na Manchester United zipo katika vita kali ya kumwania mshambuliaji wa mabingwa wa soka nchini Hispania, Real Madrid, Brahim Abdelkader Díaz.

Taarifa zinaeleza kuwa, Brahim anajiandaa kuondoka Real Madrid, kufuatia kusajiliwa kwa mshambuliaji kutoka Ufaransa, Kilyan Mbappe.

Usajili wa Mbappe unatajwa kama kizingiti kwa Brahim kucheza katika kikosi cha kwanza cha Mabingwa hao wa barani Ulaya.

Kwa muda mrefu Arsenal ilikua katika mpango wa kumsajili Brahim na iliaminika huenda ingekuwa klabu pekee katika harakati hizo, lakini kuingia kwa Man United kunafungua ukurasa mpya wa ushindani wa kuiwania saini ya mshambuliaji huyo mwenye umri wa miaka 24.

Kwa sasa ada ya usajili ya Brahim, ambaye alikuzwa na kuendelezwa kisoka na mabingwa wa soka nchini England, Manchester City inatajwa kufikia Euro 70 milioni. Hata hivyo, bado ana mkataba na Real Madrid hadi 2027.