Alex Song, Alipoamua kuchagua pesa wakati wa mavuno

Wakati Cesc fabregas akiwaaga mashabiki wa Asernal ni wazi aliondoka na vazi lake la tabasamu na kuacha vazi la huzuni lililobeba vilio, huzuni haikuchoka kutafuna furaha iliyonawili vyema kwenye nyuso zao, Alikuwa anaondoka kipindi cha giza wakati mashabiki wakihitaji mwanga.

Kilikuwa kipindi ambacho miguu ya Cesc Fabregas ilibeba thamani ya ufalme, wengi waliisujudu miguu yake pale Emirates. Alikuwa anaondoka huku wengi wakiwa wamelichora jina la Cesc Fabregas vifuani mwao.

Huzuni ilizidi kukosesha furaha fikra za wengi, Ni miguu ya Mcameroon Alex Song ndio ilifanya jina la Cesc Fabregas lisahaulike kwenye vinywa vya mashabiki wa Asernal, ilikuwa burudani ilioje kuitazama miguu ya Alex song ikiwa inagusa mpira, ulikuwa msimu bora kwa Alex Song, Jina lake lilizidi kubandikwa kila kona ya nyumba kwenye mitaa ya emirates.

Hapo ndipo pigo la pili lilipokuja, Ni Barcelona ndio waliokuja na ofa ya kiwendawazimu iliyomchanganya Alex Song, hapo alikuwa kwenye mavuno ya kipaji chake, ubora wake ulimfanya kuhamia Barcelona na kushuhudia anguko ambalo hadi kichaa alilitegemea.

Ndio wengi walitegemea anguko lake, Ungeweza vipi kupata namba mbele ya Busquets, Xavi na iniesta? Ilikuwa ni rahisi kumshawishi nyani kwamba asali ni tamu kuliko ndizi kuliko kumshawishi kocha yoyote yule kuanza na Alex Song mbele ya wendawazimu wa kihispania waliokuja duniani kwa ajiri ya kufanya mapenzi na mpira.

Licha ya ubora wa Alex Song ilionekana ni kama mbingu na ardhi kwenye kikosi kile kilichojaa mafundi haswa. Ilikuwa ngumu mno kwa kiumbe yoyote kupata namba kwenye eneo la kiungo la Barcelona.

Kwenye interview yake moja baada ya kuondoka zake Barcelona, alisema baada ya kupokea simu ya mkurugenzi wa Barcelona kuwa anahitajika na Barcelona aliambiwa kuwa atapata dakika chache uwanjani. Alex Song hakujali sana aliwaza zaidi zile pesa za Wakatarunya. Alichagua pesa wakati wa mavuno ya kipaji chake.