Ahmed Ally akubali kufukuzwa Simba

Meneja Habari na Mawasiliano wa Klabu ya Simba, Ahmed Ally amesema kuwa yupo tayari kusimamishwa kazi au kufukuzwa kabisa iwapo sababu zitakuwa ni kwa ajili ya maslahi ya klabu.

Ahmed amesema hayo kufuatia tetesi kuwa wapo baadhi ya viongozi na wachezaji wa Simba ambao wanachunguzwa kutokana na kipigo cha bao 5-1 ambacho timu hiyo imekipata Jumapili iliyopita kutoka kwa watani zao Yanga na kwamba baada ya uchunguzi huenda wakasimamishwa.

Akizungumza na Mpenja TV kuhusu tetesi za yeye kutakiwa kusimamishwa uongozi ndani ya klabu hiyo, Ahmed amesema;

"Nimesikia tetesi mitandaoni kjwamba nipo kwenye orodha ya viongozi wanaotajwa kufukuzwa Simba, kama itakuwa hivyo kwa maslahi ya Simba Sports Club basi hakuna shida.

"Hapa tunachoangalia ni kuifanya Simba kuwa imara, sasa hapo upepo unaweza kumpitia yeyote. Kwenye maslahi ya Simba hilo halina shida hata kidogo.

"Kuhusu hizo tetesi labda wamekaa nalo rohoni au wananivizia ila sijaambiwa. Labda muulizeni Kanuja (CEO wa Simba) kwamba unamla kichwa lini?," amesema Ahmed.