Nyota wa USGN, Victorien Adebayor
Mwenyekiti wa Bodi ya Wakurugenzi Simba, Salim Abdallah ‘Try Again’ ameweka wazi baada ya kurudi Tanzania ataongea na rais wa heshima wa klabu hiyo, Bilionea Mohammed Dewji ‘Mo Dewji’ namna gani watamsajili nyota wa USGN, Victorien Adebayor.
Staa huyo alicheza kiwango bora kwenye mechi dhidi ya Simba akiwasumbua mabeki pindi alipokuwa na mpira kwani ni moja ya wachezaji wenye uwezo wa kutumia vizuri mguu wa kushoto.
Try Again alisema kabla ya kucheza mchezo dhidi ya USGN aliwasiliana na wakala wa Adebayor na kuelezwa namna gani atakwenda kuwasumbua dakika zote.
“Nitaongea na rais kuona namna gani anafanya jambo tunamsajili Adebayor kwani ni moja ya wachezaji wazuri na wenye uwezo na kiwango chake si wa kucheza Denmark bali anafaa kuwa Simba,” alisema Try Again.
Kuhusu kama ataridhia kucheza Simba, Adebayor alisema kwa kifupi: “Kwa nini nikatae kucheza klabu kubwa kama hii.”
Alisema mchezaji mwenye malengo atapenda kucheza klabu yenye mafanikio lakini mengine yatajulikana baadaye. Habari zinasema Simba dirisha kubwa la usajili wataingia sokoni na watasajili sio chini ya nyota wanne wa kigeni huku tayari nafasi moja ikiwa imechukuliwa na winga wa Zanaco ya Zambia, Moses Phiri ambaye bado hajatambulishwa.
Adebayor kama atakuwa katika kiwango cha namna hiyo Simba inahitaji aina hiyo ya uchezaji kwa mujibu wa Try Again. Kwa mujibu wa mtandao wa Wikipedia, Adebayor, raia wa Niger alizaliwa Novemba 12, 1996 na sasa ana miaka 25.