Dar es Salaam. Askofu wa Kanisa la Kiinjili la Kilutheri Tanzania (KKKT) Dayosisi ya Karagwe mkoani Kagera, Benson Bagonza amezungumzia suala la Tundu Lissu kupoteza sifa za kuwa mbunge wa Singida Mashariki (Chadema) kwa kuhoji tofauti ya Bunge na bonge.
Jana Ijumaa Juni 28,2019 Spika wa Bunge la Tanzania, Job Ndugai alilieleza Bunge la nchi hiyo kwamba Lissu amepoteza sifa za kuwa mbunge kwa sababu ya kutokujaza fomu za mali na madeni ya maadili ya viongozi wa umma na kutokutoa taarifa kwake (Spika) aliko.
Spika Ndugai alisema hafahamu Lissu yuko wapi na amekuwa akimwona katika vyombo mbalimbali vya Kitaifa na Kimataifa akizungumza masuala mbalimbali huku bungeni akiwa haonekani hivyo kumwandikia barua mwenyekiti wa tume ya taifa ya uchaguzi kumweleza kiti cha Lissu bungeni kiko wazi.
Kupitia akaunti yake ya Facebook ambao Mwananchi lilipotaka kupata maoni yake kuhusu suala hilo la Lissu, Askofu Bagonza amesema ujumbe uliopo Facebook ndio maoni yake.
Ujumbe huo wenye kichwa cha habati ‘Kuna tofauti kati ya Bunge na Bonge.’
“Bunge huongozwa kwa mujibu wa Katiba, Sheria, Kanuni, tamaduni za mabunge, mila na desturi nzuri, busara na hekima.
