Wasira: Hakuna mgogoro wa kifamilia maziko ya Mkono

Mwenyekiti wa kamati ya mazikoi ya mbunge wa zamani wa Musoma Vijijini, Nimrod Mkono, Stephen Wasira amesema hakuna mgogoro wowote wa kifamilia kuhusu maziko ya mwanasiasa huyo.

 Mkono alifariki Aprili 18, 2023 huko Marekani alikokuwa akipatiwa matibabu na hadi sasa mwili haujawasili nchini, jambo ambalo limekuwa likiibua maneno kwamba kuna mgogoro wa kifamilia kuhusu maziko ya mwanasiasa huyo.

Kwa mujibu wa taarifa ya Wasira iliyotolewa leo Mei 8, 2023, amesema hakuna mgogoro wowote katika familia hiyo na kwamba wamekubaliana azikwe nyumbani kwake, Kigori, Busegwe.

“Kwa sasa taratibu za usafirishaji mwili kutoka Marekani zinaendelea vizuri kwa kushirikisha familia ya Wakili Mkono na Ubalozi wa Tanzania nchini jijini Washington, Marekani.

“Tunauhakikishia umma kwamba hakuna mgogoro wowote wa kifamilia juu ya suala hili. Familia imepanga mwili wa Wakili Mkono upumzishwe nyumbani kwake Kigori, Busegwe,” amesema Wasira katika taarifa yake.

Amesema taarifa ya kuletwa kwa mwili wa marehemu itatangazwa na baada ya hapo ratiba kamili ya maziko itatolewa ili kuwawezesha ndugu, jamaa na marafiki walio ndani na je ya nchi kushiriki kikamilifu.