Wasimulia walivyoshuhudia moto ukiteketeza jengo Mwanza

Wafanyabiashara katika jengo la ghorofa moja lililopo Mtaa wa Rwagasore jijini Mwanza wamesema moto ulioteketeza eneo la juu la jengo hilo lenye maduka ya simu na vifaa vya umeme umezuka Saa 6 mchana wa leo Oktoba 30, 2023.

Akizungumza leo, Mfanyabiashara anayemiliki duka katika eneo hilo, Abdulkarim Hamza amesema ameona moshi ukitokea eneo la juu ya jengo hilo ndipo ulipoanza kusambaa kwenda kwenye maduka mengine.

Mfanyabiashara huyo amesema baada ya kuona moto ukisambaa wakaanza kuhamisha bidhaa huku akisema kuna bidhaa nyingine zilizoteketea katika jengo hilo. Mfanyabiashara mwingine, Titus Mushi amesema duka lake halijaathiriwa na moto huo kwani aliwahi kuondoa bidhaa ndani ya duka lake kabla moto haujasambaa.