Wanandoa wafariki dunia, kichanga wao anusurika ajalini Dodoma

Watu wawili mke na mume wamefariki dunia kwenye ajali iliyohusisha gari ndogo na treni katika makutano ya reli, Kata ya Tambukareli, Dodoma.

Akizungumzia marehemu hao Mganga Mfawidhi wa Hospitali ya Rufaa ya Mkoa wa Dodoma, Ibenzi Ernest amesema walipokea mwili wa mwanamke Furaha Rashid huku mume wake Hussein Chilala akiwa katika hali mbaya.

“Ilikuwa majira ya saa tatu usiku mwanamke tulimpokea akiwa tayari amefariki, lakini mwanaume alikuwa na hali mbaya na wakati anapatiwa huduma akafariki muda mfupi baadaye,” amesema Ibenzi.

Ibenzi amesema marehemu waliumia zaidi kichwani hali iliyosababisha kuvuja damu nyingi na kupoteza maisha.

Hata hivyo, katika ajali hiyo ambapo marehemu walikuwa na mtoto wao anayekadiriwa kuwa na mwaka mmoja, Ibenzi amesema walimpokea mtoto huyo akiwa mzima na alisema amechukuliwa na mama yake mdogo kwani hakuumia sehemu yoyote.

Kamanda wa Polisi Mkoa wa Dodoma, Martin Otieno amethibitisha kutokea kwa ajali hiyo na kusema atamrudia mwandishi baada ya kumaliza kikao.