Wananchi Ludewa waangua kilio kisa maji

Wakazi wa kijiji cha Kipingu kata ya Ruhuhu na kijiji cha Kiyogo Kata ya Masasi wilayani Ludewa mkoani Njombe wameangua vilio wakiomba kupelekewa huduma ya maji safi na salama.

Hii ni baada ya kukumbana na majanga ya kujeruhiwa na wengine kukumbwa na vifo vinavyosabishwa na Mamba waliopo katika mto Ruhuhu ambako ndiko wanakochota maji hayo.

Vilio hivyo wameviwasilisha mara baada ya mbunge wa jimbo la Ludewa, Joseph Kamonga kuwasili viijijini hapo ikiwa ni mwendelezo wa ziara yake ya kupita kijiji kwa kijiji ili kusikiliza changamoto mbalimbali.

Mbunge huyo alipowasili katika kijiji cha Kiyongo, wananchi waliwasilisha changamoto hiyo kwa machozi kitu ambacho kikapelekea mbunge huyo kuahirisha mkutano.