RC Chalamila amuapisha DC Mpya Temeke

Mkuu wa Mkoa wa Dar es Salaam, Albert Chalamila leo Jumanne Julai 4, 2023 amemuapisha Mkuu wa Wilaya ya Temeke, Mobhare Matinyi kufuatia uteuzi uliofanywa juzi na Rais Samia Suluhu Hassan.

Uapisho huo umefanyika katika ukumbi wa mikutano wa ofisi ya Mkoa huo Ilala Jijini Dar es Salaam na kuhudhuriwa na viongozi mbalimbali wa Sekretarieti na Wilaya za Mkoa wakiongozwa na katibu Tawala wa Mkoa, Rehema Madenge.

RC Chalamila amemtakia majukumu mema katika kuwahudumia wananchi wa Wilaya ya Temeke huku akitoa rai kwa viongozi wa manispaa na wilaya kumpa ushirikiano kiongozi huyo.

Julai 2, 2023 Rais Samia alitengua uteuzi wa Wakuu wa Wilaya wa Temeke na Kilindi na kuteua wengine kushika nyadhifa hizo.

Alimteua Matinyi kuwa Mkuu wa Wilaya ya Temeke na nafasi ya Kilindi ikizibwa na Hashim Mgandilwa aliyehamishwa kutoka Wilaya ya Tanga Mjini.

Pia, Rais alimteua James Kaji kuwa Mkuu wa Wilaya ya Tanga Mjini aliyechukua nafasi ya Mgandilwa.